“E
non debo en maneira ningunha poñer en dúbida a verdade de tales
cousas se, tendo convocado, para examinalas, os meus sentidos todos,
a miña memoria e o meu entendemento, nada me di ningunha destas
facultades que non se compadeza co que me din as demais. Pois non
sendo Deus capaz de enganarme, séguese necesariamente que nisto non
estou enganado. Pero a necesidade dos negocios obríganos moitas
veces a dicirnos antes de ter feito estes coidadosos exames; e hai
que confesar que a vida humana propende moito ó erro nas cousas
particulares; en suma, é preciso recoñecer que a nosa natureza é
endeble e dispón de poucas forzas.”
(Meditacións
metafísicas,
final da meditación sexta)
Descartes
demostra a existencia das cousas materiais, é dicir, da realidade
extramental, nas Meditacións metafísicas, en concreto na sexta
meditación. Esta demostración baséase na existencia de Deus.
No
comezo da sexta meditación Descartes xa afirma que a existencia das
cousas exteriores xa quedou demostrada mediante a existencia de Deus,
e tamén “en
tanto que se consideren como obxectos das demostracións xeométricas,
xa que desa maneira as concibo moi clara e distintamente.”
(Meditacións
metafísicas,
sexta meditación)
A
continuación fai unha disertación sobre a imaxinación e o “sentir”
(a percepción sensorial). Considera que só podemos percibir aquilo
que está presente e entra en contacto con algún órgano dos nosos
sentidos. Conclúe que as ideas que recibe polo sentidos son moito
máis explícitas e vivas cás que se podían imaxinar, meditar ou
recordar. Considerou entón, que non podían proceder do propio
pensamento, senón que necesariamente debían estar causadas na mente
por outras cousas. Polo tanto, as os obxectos sensibles existen.
Tamén
se apoia na idea da veracidade divina, é dicir, que Deus na súa
perfección non nos engana con ideas erróneas sobre as cousas
sensibles se non existisen (porque isto sería unha sorte de
imperfección, impensable en Deus). O sentir é unha facultade
pasiva, que precisa doutra (activa) para que funcione, polo tanto as
cousas corporais existen fóra do suxeito pensante.
“O
que está natureza me ensina máis expresa e sensiblemente é que
teño un corpo, o cal, cando sinto dor, está mal disposto, e cando
teño os sentimentos de fame ou sede, necesita comer e beber,
etcétera. Polo tanto, non debo dubidar de que hai nisto algo de
verdade.”
(Meditacións
metafísicas,
sexta meditación). A existencia do corpo próbaa, por exemplo, coa
cuestión da dor ou das necesidades corporais: se fosemos
exclusivamente seres pensantes (res
cogitans
pura) non sentiriamos dor, a dor indica que posuímos un corpo con
realidade extramental. Do mesmo xeito demostra a existencia doutros
corpos e, en xeral, das realidades exteriores.
Fanse
referencias constantes ó dualismo de alma e corpo que establece
Descartes, afirmando que hai ideas que proveñen da percepción
sensible (do corpo) e outras que non precisan do corpo para que
aparezan, que veñen a nós por “luz natural” (ideas innatas). O
dualismo está claro desde o punto en que considera á alma e ó
corpo substancias diferentes (res
cogitans
e res
extensa).
E finalmente nesta meditación tamén se establece a diferenza entre
a vixilia e o sono, e a importancia da memoria.
Como
substancia, a res
extensa
ten un atributo esencial. Este atributo é necesario e suficiente
para recoñecela, e é o que percibimos clara e distintamente con
respecto a ela. No caso da res
extensa
é, precisamente, a extensión (magnitude, lonxitude, anchura,
profundidade, etc.).
A
demostración da res
extensa,
a partir da existencia de Deus, fai posibles as ciencias, que
quedaran suxeitas á dúbida nun primeiro momento. Daquela, sendo
Deus a garantía do mundo exterior, a veracidade divina é o
fundamento último da física cartesiana, baseada nesta idea de
extensión.
Nisto
sustenta Descartes o seu mecanicismo, aparece un mundo ríxido
constituído pola extensión e o movemento, e dominado polos
principios de inercia e de conservación do movemento.
No hay comentarios:
Publicar un comentario