“(…)
e como non hai a menor repugnancia en pensar que o máis perfecto
sexa consecuencia e dependencia do menos perfecto que en pensar que
de nada proveña algo, non podía tampouco proceder de min mesmo; de
sorte que só quedaba que tivese sido posta en min por una natureza
verdadeiramente máis perfecta que son eu, e posuidora inclusive de
tódalas perfeccións de que eu puidese ter idea; isto é, para
explicalo nunha palabra, por Deus.” (Discurso
do método, cuarta
parte)
A cuestión de Deus e a veracidade divina trátase tanto no Discurso do método (na cuarta parte) como nas Meditacións metafísicas (sobre todo na cuarta, aínda que tamén na quinta e a sexta). Nas Meditacións metafísicas trátase o tema con máis exhaustividade.
En
primeiro lugar debemos preguntarnos por qué chegados a este punto
Descartes ten a necesidade de recorrer a Deus para probar a
veracidade dos nosos coñecementos. A resposta é que foi a única
saída que atopou para o solipsismo, a evidencia absoluta do suxeito
pero coa conseguinte invidencia con respecto a todo o demais.
Deste
xeito, Descartes no Discurso
do método
explica que xa que non somos perfectos (cousa que se mostra no mero
feito de non podernos obter coñecemento absoluto e evidente de
todo), o que coñecemos debemos telo aprendido dalgún ser cunha
natureza máis perfecta. Tamén enumera as características que ten
Deus (e que os seres humanos non posuímos): é infinito, eterno,
inmutable, omnisciente, omnipotente e, polo tanto, perfecto.
Con
todo, onte se trata a cuestión da res
infinita
en máis profundidade é nas Meditacións
metafísicas, en
concreto na terceira (a partir da terceira fai referencias continuas
á existencia de Deus). En primeiro lugar dá mostras do solipsismo
no que se atopa. Ata o momento Descartes expuxo o seu método, os
tres graos nos que somete o coñecemento a dúbida e a primeira
certeza: o cogito. A continuación explicará como se garante a
veracidade dos coñecementos dos que se dubidara anteriormente. Será
mediante a existencia dun Deus que non sexa “enganador” (é
dicir, que non sexa o xenio maligno que se formulara como hipótese
na cuestión da dúbida).
En
primeiro lugar, Descartes considera que as súas ideas (ou polo menos
parte delas) non proveñen del mesmo, senón de fóra, non dependendo
da vontade so suxeito. Os argumentos que utiliza para probar a
existencia de Deus remiten precisamente ó contido do que pensa ese
suxeito pensante (as ideas desta res
cogitans),
á idea de Deus, que é innata á alma. Ademais, de acordo co seu
método debe partir do que xa coñece con claridade e distinción: a
res
cogitans.
Son tres os argumentos e veremos a continuación en que consiste cada
un.
O
primeiro argumento baséase na causa da idea de Deus. As ideas teñen
realidade obxectiva, son accións da mente, pero distínguense polo
que representan, é dicir, polo seu contido. A causa da idea ten que
ter tanta realidade coma a idea mesma, porque se non habería que
aceptar que algo procede da nada (o cal é inadmisible). De aquí
dedúcese que se temos unha idea superior a nós mesmo, non podemos
ser nós a súa causa, senón que a causa debería ser un ser
superior tamén. Posto que efectivamente temos a idea desa substancia
infinita, eterna, inmóbil, omnisciente e omnipresente, ten que
existir un ser con esas características que producise tal idea, co
cal Deus existe. Este argumento lembra ó de Santo Anselmo, do século
XI.
O
segundo elemento formúlase en relación coa causa, xa non da idea de
Deus, senón da propia res
cogitans.
A existencia deste suxeito pensante que dubida e que se descobre na
dúbida debe ser tamén un ser superior, é dicir, Deus.
Por
último temos o terceiro argumento, que deu en chamarse o argumento
ontolóxico da existencia de Deus. Esta é a proba, quizais, máis
célebre das que ofrece. Vén a dicir que posuímos a idea dun ser
soberanamente perfecto, idea que posuímos clara e distintamente, coa
mesma claridade e distinción coa que percibimos que os tres ángulos
dun triángulo son iguais a dous ángulos rectos (180º). Con todo,
esta idea non demostra a existencia do triángulo. No caso de Deus
non é así, porque na propia idea de Deus incluímos a existencia,
xa que un ser soberanamente perfecto debe tela entre as súas
características, ou non sería perfecto (poderiamos imaxinar un ser
que ademais destas características posuíse a existencia, o que o
faría máis perfecto). En síntese: se podemos concibir a idea de
Deus como ser perfecto, incluímos necesariamente a existencia nas
súas características. Esta proba redúcese a unha intuición
inmediata da natureza de Deus na que se inclúe a existencia
necesaria.
Estas
probas son, por suposto, refutables, sobre todo se temos en conta que
recorre a Deus para probar a capacidade cognoscitiva, e por outro
lado afirma a Deus a partir das ideas innatas que nos puxo na mente.
Incorre nunha especie de círculo vicioso.
O
que nos interesa máis que nada aquí é que da existencia de Deus no
sistema cartesiano depende a certeza dos contidos da razón. Sen o
coñecemento de Deus sería imposible chegar a coñecer as cousas.
A
partir de aquí, Descartes vainos falar da res
cogitans infinita,
que é unha substancia. Unha substancia é unha cousa que existe de
tal xeito que non precisa de ningunha outra cousa para existir. Cada
substancia ten uns atributos esenciais e outros non esenciais. O
atributo esencial de Deus é a perfección. Posúe características
como as xa mencionadas: é infinito, eterno, inmutable, independente,
omnisciente, omnipotente, etc.
Como
conclusión podemos sinalar que para fuxir do solipsismo, Descartes
recorre á existencia divina e á súa veracidade. Por suposto, un
ser perfecto e bo coma Deus non vai ser un “xenio maligno” e non
vai permitir que nos enganemos no contido dos nosos pensamentos.
Descartes apunta, por outra banda, que coa existencia de Deus
probada, xa non resulta difícil saber que ideas podemos dar por
verdadeiras e cales non (en relación á distinción entre sono e
vixilia, por exemplo). A veracidade divina é, polo tanto, o
fundamento dos coñecementos do suxeito pensante ou
res cogitans.
No hay comentarios:
Publicar un comentario